د . أحلام الحسن
ياما قلنا وياما حكينا
ياما خبينا وياما دارينا
الحب مش لعبة وكلام
ولا خشخيشة في إيدينا
الحب له معاني واحساس
مش قسوة مش خيانة لينا
اللي عنده ألف قلب وقلب
بلاش يحب ويكثر مآسينا
هو بيحلم بحبه والا كزاب
والا منشار يقطع أمانينا
تسمع كلامه تشوف فعاله
لحد إمتى حيمثل علينا ؟!
وفي كل مرة نقول نسينا
ترجع من تاني تجرح فينا !
أمال فين عهدك وحبك ؟!
قولي ليه عمال تبكينا !!
جواك قولي فين اﻹنسان
هو المشاعر عندك جنينة !
تقطف ورودها وتحرقها
كل دا وتملي قدام عنينا !
ضميرك إمتى حيصحي
وإمتى تندم وتبكي علينا
عامل مهضوم و مظلوم
ومن ظلمك ياما قاسينا !
شبعنا كلام شبعنا أنغام
كفاية خلاص بلاش تكوينا
أوراقك كلها مكشوفة
وبلاش تاني ترجع لينا
الحب مش سراب وخيال
يجي ويروح تملي علينا
دا ظل الحب ما بيتغيرش
زي الميه ..دايما يروينا
حبك زي الصحرا الجافة
بدون ميه وكلمة تشفينا
وزي ما بيقولوا حأقول
أكرر غناوي اللي قبلينا
( إنته فين والحب فين )
خلينا بعيد عنك خلينا
عهدك عمال ينزف ومات
روح إدفنه.. منه أوعينا
من الكابوس دا إصحينا
حنسيبك وحنلم أواعينا
والله منك خلاص صحينا
كفاية اللي شافته عنينا
